विराटनगर। आज मंगलबार साँझ विराटनगरको बरगाछी चोकमा भारतीय मालवाहक सवारी (ट्रक)ले मोटरसाइकललाई ठक्कर दिंदा एक महिलाको घटनास्थलमै मृत्यु भएको छ।
जिल्ला प्रहरी कार्यालय मोरङका अनुसार मृत्यु हुनेमा सर्लाही जिल्ला, हरिपुर नगरपालिकाकी ४५ वर्षीया रोहिला कोइराला अधिकारी रहेका छन्। मृतक श्रीमान् विमल कोइरालाले चलाइरहेका मोटरसाइकलको पछाडि सवार रहेकी अधिकारी ट्रकको ठक्करपछि घटनास्थलमै निधन भएको स्थानीयले बताएका छन्। प्रत्यक्षदर्शीका अनुसार दुर्घटना अत्यन्तै दर्दनाक थियो।
मोटरसाइकल चालक तथा मृतकका श्रीमान् विमल कोइराला भने सकुशल रहेका छन्। मृतकको शव पोस्टमार्टमका लागि विराटनगरस्थित कोशी अस्पतालमा राखिएको छ। प्रहरीले दुर्घटनाको थप अनुसन्धान गरिरहेको छ।
