विराटनगर ।भन्सार विभागले अनधिकृत व्यक्तिको संलग्नता नियन्त्रण गर्दै प्रचलित कानुनअनुसार इजाजतप्राप्त भन्सार एजेन्ट तथा प्रतिनिधिमार्फत मात्र मालवस्तु जाँचपास गराउने सम्बन्धमा जारी गरेको निर्देशनप्रति भन्सार एजेण्ट महासंघ नेपाल र विराटनगर भन्सार एजेन्ट संघले समर्थन जनाएका छन् ।
विराटनगर भन्सार एजेन्ट संघले बिहीबार विज्ञप्ति जारी गर्दै भन्सार विभागको निर्देशन स्वागतयोग्य रहेको जनाएको हो । संघले विभागको निर्देशनले भन्सार नाकामा हुने अनधिकृत प्रवेश तथा गतिविधि नियन्त्रण गर्नुका साथै भन्सार प्रणालीलाई थप पारदर्शी, व्यवस्थित र जवाफदेही बनाउन सहयोग पुग्ने विश्वास व्यक्त गरेको छ ।
विराटनगर भन्सार एजेन्ट संघका अध्यक्ष देवकी नन्दन शर्माले कानुनले स्पष्ट रूपमा भन्सार एजेन्टको अधिकार र जिम्मेवारी निर्धारण गरेको अवस्थामा अनधिकृत व्यक्तिको संलग्नता हुनु पेशागत मर्यादाविपरीत भएको बताए । उनका अनुसार यसले राजस्व प्रशासन तथा व्यापार सहजीकरणमा समेत चुनौती सिर्जना गर्न सक्छ ।
संघले आफ्ना मातहतका सम्पूर्ण भन्सार जाँचपास प्रतिनिधिलाई प्रचलित कानुन, विभागीय निर्देशन तथा पेशागत मर्यादाको पूर्ण पालना गर्दै जिम्मेवारी निर्वाह गर्न आग्रह गरेको छ ।
भन्सार एजेण्ट महासंघ नेपालका सचिव प्रविण जोशीले विभागबाट जारी पत्र अत्यन्त स्वागतयोग्य रहेको बताए । उनले भने, “यसले भन्सारमा हुने अनधिकृत प्रवेश र गतिविधि नियन्त्रण हुने हाम्रो बुझाइ छ ।”
जोशीका अनुसार महासंघको अभियान देशभरका भन्सार नाकामा कानुनी रूपमा इजाजतप्राप्त एजेन्टलाई मात्र काम गर्ने वातावरण निर्माण गर्ने उद्देश्यसँग जोडिएको छ । उनले विराटनगर भन्सार एजेन्ट संघले जनाएको ऐक्यबद्धताले अभियानलाई थप बल पुगेको बताए ।
महासंघले विभागीय निर्देशन कार्यान्वयनका क्रममा स्थानीय भन्सार कार्यालयमा देखिन सक्ने व्यवहारिक समस्या, जाँचपासको गति, वस्तु परीक्षण, सेवा प्रवाह तथा राजस्व असुलीलगायत विषयलाई तथ्यगत रूपमा अभिलेखीकरण गरी सम्बन्धित निकायसँग संवाद र सहकार्यका माध्यमबाट समाधान खोजिनुपर्नेमा जोड दिएको छ ।
विराटनगर भन्सार एजेन्ट संघले कानुनको पालना, पेशागत मर्यादा र संस्थागत एकता नै आधुनिक, पारदर्शी तथा व्यवस्थित भन्सार प्रणालीको आधार भएको उल्लेख गर्दै विभागीय निर्देशन कार्यान्वयनमा सम्बन्धित सबै पक्षलाई सहयोग गर्न अपील गरेको छ ।
